१४ किलो सुन शौचालयमा लुकाएर विमानस्थल बाहिर निकाल्ने थियो योजना

२२ मंसिर, काठमाडौं । त्रिभुवन अन्तर्राष्ट्रिय विमानस्थल भन्सार कार्यालयले बिहीबार राति ११ः४० बजे विमानस्थलबाट १४ किलो सुन बरामद गर्‍यो ।

सुन बरामद भएपछि सार्वजनिक भिडियोमा पक्राउ परेका व्यक्ति चन्द्र घले सुनका ७ वटा बिस्कुट आकारका चक्की बोकेर सामान्य ढंगले हिँडेको देखिन्छ । १४ किलो सुन बोकेका व्यक्ति कसरी त्यति निष्फिक्री विमानस्थल स्थलभित्र हिँडिरहे ? धेरैले प्रश्न गरेका छन् ।

कतिपयले विमानस्थलभित्र सेटिङविना कसैले किन त्यत्रो परिमाणको सुन ल्याउने जोखिम उठाउन सक्छ भनेर शंका पनि गरेका छन् । त्रिभुवन विमानस्थल भन्सार कार्यालयका प्रमुख प्रशासक टोकराज पाण्डेले पनि शुक्रबार आयोजित पत्रकार सम्मेलनमा यस्तै प्रश्नको सामना गर्नुपर्‍यो । तर, उनले आरोपीलाई विमानभित्रै समातेर विमानस्थलको ‘वाक थ्रु गेट’मा ल्याएकाले त्यस्तो देखिएको हुनसक्ने तर्क गरे ।

पहिल्यै समातिएका हुन्, पछि भिडियो खिचेकाले त्यस्तो लागेको हुनसक्छ’, उनले भनेका छन् । यद्यपि, प्रश्न अझै रहन्छ – ६० किलो सुन समातिएर मुद्दाको किनारा समेत लागिनसक्दै फेरि कसैले किन झण्डै १४ करोड रुपैयाँ बराबरको सुन लिएर हिँड्ने जोखिम उठाउँछ ?

सुन प्रकरणको अनुसन्धानमा खटिएका अधिकृतहरुले यो जिज्ञासाको जवाफ भेटेको भन्सार स्रोत बताउँछ । भन्सार स्रोतका अनुसार, पक्राउ परेका घलेलाई यूएईबाट ल्याएको सुन अध्यागमनको शौचालयमा राख्न भनिएको थियो ।

सुन विमानस्थलबाट कसरी बाहिर निकालिन्थ्यो र यसमा अरु को–को संलग्न थिए भन्ने विषयमा छानबिन गर्न प्रमुख भन्सार अधिकृत मणिराम पौडेलको संयोजकत्वमा समिति गठन भएको छ ।

समितिमा नेपाल प्रहरीका डीएसपी सूर्यप्रकाश सुवेदी, भन्सार अधिकृत प्रकाश निरौला, भन्सार अधिकृत डिल्लीप्रसाद शर्मा, शाखा अधिकृत मञ्जु थापा र भन्सार अधिकृत लोकराज ढुंगाना सदस्य छन् । उनीहरुलाई ५ दिनभित्र छानबिन गरेर प्रतिवेदन बुझाउन भनिएको छ ।

पक्राउ परेका घले राति ११ः४० बजे फ्लाई दुबईको जहाजबाट काठमाडौं अवतरण गरेका थिए । उनीसँगको सोधपुछपछि राति नै प्रहरीले मीनबहादुर घलेलाई पनि पक्राउ गरेको छ । चन्द्रले मीनबहादुरले आफूलाई पठाएको बताएपछि उनलाई प्रहरी टोलीले पक्राउ गरेको थियो ।

‘उनीसँग सुन छ भन्ने यकिन भएपछि त्यहीँ नियन्त्रणमा लिएर एक्सरेमा ल्याएका थियौं’, विमानस्थल भन्सार प्रमुख पाण्डेले भने, ‘त्यसक्रममा उनले छातीको दायाँ बायाँ लगाएको ज्याकेटभित्रका खल्तीमा दुई÷दुई किलोको ७ वटा सुनको बिस्कुट फेला प¥यो ।’

प्रहरीको उपत्यका अपराध अनुसन्धान कार्यालयले शुक्रबारै रसुवा नाकाबाट आएको दुई किलो अवैध सुन बरामद गरेको छ । कार्यालयले तीन दिनअघि न्यूरोडको सुन पसलमा छापा मारेर झण्डै ८ किलो अवैध सुन समेत बरामद गरेको थियो ।

केही समयअघि विमानस्थलको सबै सुरक्षा जाँच पास भएर बाहिरिएको ६० किलो सुन राजश्व अनुसन्धान विभागले बरामद गरेको थियो । त्यसअघि भेपमा लुकाएर ९ किलो सुन ल्याएको समेत खुलेको थियो । यो मामिलामा पूर्वसभामुख कृष्णबहादुर महराका छोरा राहुल अहिले पनि थुनामा छन् ।

सुन प्रकरणको अनुसन्धानका लागि सरकारले उच्च अदालतका पूर्वन्यायाधीश डिल्ली आचार्यको नेतृत्वमा छानबिन समिति बनाएको छ । समितिले यी प्रकरणका आरोपीहरुको हाल बयान लिइरहेको छ ।