साफ यू-१९ च्याम्पियनसिप : मालदिभ्सलाई ४-१ ले हराउँदै नेपाल सेमिफाइनलमा

समूह 'ए' को उपविजेता बन्दै नेपाल सेमिफाइनल प्रवेश गरेको हो । समूह 'ए' बाट भने विजेता बन्दै पाकिस्तान पनि सेमिफाइनल चरणमा प्रवेश गरेको छ । नेपालका लागि समिर तामाङले २ गोल गरे ।

त्यस्तै प्रशान्त लक्सम र निराजन धामीको नाउँमा एक-एक गोल रह्यो । नेपालका लागि १८औं मिनेटमा गोल गर्दै प्रशान्त लक्समले अग्रता दिलाएका थिए । त्यस्तै खेलको ३०औं मिनेटमा समिर तामाङले उत्कृष्ट गोल गर्दै अग्रता दोब्बर बनाएका थिए । खेलको ३५औं मिनेटमा दुवै टिम १० खेलाडी सीमित भएको थियो ।

नेपालका सुजन डंगोल र मालदिभ्सका कप्तान मोहम्म आयन हसन रेड कार्ड पाउँदै मैदानबाट बाहिरिएका थिए । मालदिभ्सका लागि खेलको ५८औं मिनेटमा आदम रसिदले गोल फर्काएका थिए । त्यस्तै खेलको ८८औं मिनेटमा नेपालका लागि निराजन धामीले गोल गर्दै ३-१ को अग्रता बनाएका थिए । त्यस्तै खेलको इन्ज्युरी समयमा नेपालका लागि समिर तामाङले पुन: गोल गर्दै ४-१ को सहज जित दिलाए ।

नेपालले अब सेमिफाइनलमा समूह बीचको विजेतासँग खेल्नेछ । सोमबार साँझ ५:३० बजे हुने भारत र भुटानबीचको खेलको विजेतासँग नेपालले सेमिफाइनलमा प्रतिस्पर्धा गर्नेछन् ।